പുലരി

പുലരി

കത്തിയെരിഞ്ഞുരുകിത്തിളച്ചുമറിയുന്ന
വേനൽത്താപത്തിൽ,
ഈരിലയിട്ടുവിരിഞ്ഞ മോഹങ്ങളെയെല്ലാം
മരവിപ്പിച്ചുമയക്കുന്ന
ഹേമന്തശീതത്തിൽ,
സങ്കടപ്പെയ്ത്തുകൾ മത്സരിച്ചിരമ്പിയാർക്കുന്ന
കൊടും വർഷപാതത്തിൽ,
അരിമുല്ല പൂത്തുലർന്ന വാസന
അയലോരങ്ങളെ
ആമോദം കൊള്ളിച്ചുമദിക്കുന്ന
വാസന്തത്തിൽ, …..
ഋതുഭേദങ്ങളുടെ തിരക്കിട്ട കടന്നുപാച്ചിലിലും
നിറന്നുലർന്നൊരു കുളിർവെളിച്ചം
അകം പുറങ്ങളിലാകെ ചൂടി
വിറയാണ്ട മുഖമുയർത്തിയുയർത്തി
നിന്നുചിരിക്കുന്ന സൂര്യകാന്തിപ്പൂവ്.
വിരിഞ്ഞുയരുന്ന വാസരദലങ്ങളിലാകെ
നാളെയുടെ നിറസ്നേഹമൊതുക്കി
പുതുപുലരിയിലേക്ക്
വീണ്ടും കണ്ണെറിയുന്നു.